JAX-Swaroopyog

[२४३]
तुझे देह भिन्न माझे देह भिन्न |
ऐसा हा अभिमान कासयासी ||१||
एक चि अभिन्न आत्म-तत्व पाहीं |
द्रष्टा दृश्य नाही भाव जेथें ||२||
चार हि देहांचा करोनी निरास |
उन्मनीपदास गांठीं बापा ||३||
स्वामी म्हणे जिणें तरी चि सफळ |
नातरी केवळ भारभूत ||४||

[२४४]
कर्तृत्वाचा मद सांडोनी समस्त |
करी यथोचित कर्मे सारी ||१||
कर्म-फलाठायी न ठेवीं आसक्ती |
अलिप्तता चित्तीं असों देई ||२||
घडे तें तें कर्म होतां कृष्णार्पण |
कर्माचें बंधन उरे कोठें ||३||
स्वामी म्हणे कर्मे करोनी सकळ |
संन्यासाचें फळ अनायासें ||४||