JAX-Swaroopyog

[७४]
पडे त्यासी पडो विश्वाचें हें कोडें |
आम्हांसी उघडें आत्म-रूप ||१||
एक आत्म-रूप सर्वत्र संचले |
नाही त्यावेगळें दुजे काहीं ||२||
जळीं स्थळीं काष्ठी पाषाणीं संपूर्ण |
आत्म-रूप जन प्रकटले ||३||
आत्म-रूप दृष्टी आत्म-रूप सृष्टी |
आत्मा पाठी-पोटी स्वामी म्हणे ||४||

[७५]
वेदांताचे सार सांगतों साचार |
नका वारंवार पुसो आता ||१||
सत्य एक आत्मा नित्य निर्विकार |
जाणा चराचर मायाभास ||२||
दिसे जें लोचना भासे जें जें मना |
तें तें मिथ्या जाणा माया-रूप ||३||
विश्व आणि माया एक चि अभिन्न |
जाणा ही चि खूण स्वामी म्हणे ||४||