JAX-Swaroopyog

[६०]
नको व्रत नेम नको तीर्थाटन |
हरिसी शरण जय वेगें ||१||
नको योग-याग नको भोग-त्याग
हरि-नाम चांग दृढ धरीं ||२||
नको मंत्र-तंत्र नको कर्म-धर्म |
घेई हरि-नाम भक्तिभावें ||३||
स्वामी म्हणे नको नाना देह-दंड |
चालवी अखंड नाम-घोष ||४||

[६१]
लोक-सेवा व्रत आचरिती भावें |
तयांतें मानावें भाग्यवंत ||१||
लोक-सेवेसाठी सत्यातें स्मरून |
करिती ते दान सर्वस्वाचें ||२||
त्या चि सेवा-व्रतें तोषे जगन्नाथ |
शुद्ध करी चित्त सेवकाचे ||३||
स्वामी म्हणे तेणे लाभे आत्म-ज्ञान |
जनी जनार्दन प्रकटतो ||४||