JAX-Swaroopyog

[१७१]
अंतरी भजन चाले रांत्र-दिन |
तेणें समाधान अनिर्वाच्य ||१||
नित्य नाम-जप होतो आपेंआप |
तया सुख माप कोण करी ||२||
शब्दाविण ध्वनी करोनी श्रवण |
ठेवी अनुसंधान आत्म-रुपी ||३||
स्वामी म्हणे खूण घ्यवी ओळखून |
संतांसी शरण जावोनियां ||४||

[१७२]
पाहे ज्याची दृष्टी सर्वत्र श्रीहरी |
भक्त तो संसारी भाग्यवंत ||१||
रामकृष्ण हरि उच्चारी वैखरी |
भक्त तो संसारी भाग्यवंत ||२||
आठवी श्रीहरी नित्य ह्रदंतरी |
भक्त तो संसारी भाग्यवंत ||३||
स्वामी म्हणे भक्तीपासी चारी मुक्ती |
भाग्य नाहीं मिती भक्ताचिया ||४||