JAX-Swaroopyog

[१३१]
आम्हा रांत्र-दिन हरीचें चिंतन |
हरि-पायी मन स्थिरावलें ||१||
आतां अंतर्बाह्य हरीचें दर्शन |
झाले त्रि-भुवन हरि-रूप ||२||
देखता चरण गेले मी-तूं-पण |
संसाराचे भान हारपलें ||३||
ध्येय-ध्याता -ध्यान होवुनी आपण |
खेळे नारायण स्वामी म्हणे ||४||


[१३२]
भक्त तो प्रेमळ अर्पितो केवळ |
पान फूल फळ भक्ति-भावें ||१||
भक्ताची ती भेट आवडे अनंता |
भुलोनी देखतां मुखी घाली ||२||
षोडशोपचार पूजेचा संभार |
भार तो साचार भावाविण ||३||
येर फुल पान भक्तीची ती खूण |
भाव चि प्रमाण स्वामी म्हणे ||४||